Mga Pako sa Kahadlok 

Milupad na usab ang mga pako

sa kahadlok gikan sa mga tawo

nga naghupot og dili masukad

nga kasilag sa dughan. 

Kasilag batok sa kagahapon

Kasilag batok sa kauswagan 

Kasilag batok sa demokrasya

Kasilag batok sa makita nga kalipay, 

gugma og panagkahiusa sa katawhan. 

Ang mga pako nga gisakyan

sa mga nagasabwag sa  kasilag,

 pagdumot og panimalus -

nga nagtinguha sa pagpatay 

sa katawhan nga nagpuyo sa kalinaw

ania milupad na usab sa atong nataran

sa Manchester, London og ubang

katilingbanong pinuy-anan. 

Ang mga pako sa kasilag, 

mga pako sa  mga dautan

ania ginasabwag og gibati 

nga nag-ulipon og nagkuha 

sa atong kagawasan.

Putlan ta ang mga pako sa 

mga dautan. Buntogan ta ang 

kahadlok sa pagsud-ong sa 

ilang binuhatan. Batonan 

ang kaisog sa pagputol sa ilang 

mga pako. 

_____________

ELizabeth Padillo Olesen 

June 3, 2017 (London Bridge terror attack)  

Katulog og Batoni ang Kalinaw

Katulog gikan sa kasikas sa adlaw
sa buluhaton nga walay katapusan;
Katulog gikan sa kasaba sa mga balita:
sa gira, sa kamatay, sa mga pagdaogdaog 
og sa walay hunong nga pagsiyagit 
nga mabatonan ang hustisya. 

Katulog diha sa kangitngit,
diha sa kahilom sa kagabhion
og sulod sa pultahan sa mga damgo
sa damgo alang sa kabag-ohan,
sa damgo alang sa kausaban
sa damgo alang sa kalinaw 
og kalipay sa tanang katawhan.
_______________________________

Elizabeth Padillo Olesen
Cebuano language, one of the 87 Philippine languages

____________

April 11, 2017

Paglaum bisan diha sa  Kagabhion

Balik na usab sa kagabhion
pahulay human sa kasikas sa adlaw
Katulog og sulod sa pultahan sa mga damgo
Didto ibuhos ang paglaum sa bag-ong adlaw
wad-a  ang kaguol, ang  kalagot, 
ang kakapoy og sa pagtoo nga ikaw 
nag-inusara lamang sa ngitngit 
og ngi-ob nga  kagabhion. 

Sulod sa pultahan sa mga damgo 
og ayaw siradoi ang maong pultahan
Panginhas sa kalipay, katawa og 
paglaum sulod sa dughan og hunahuna
Ayaw tuguti ang kakapoy sa lawas og
hunahuna  nga maghimo kanimong ulipon.

Batoni ang paglaum sa bag-ong adlaw 
Katawa og batoni ang pagtoo sa init 
nga adlaw nga maghatag og kainit
og kaisog sa imong galamhan alang 
sa bag-o og masidlakon nga ugma. 
_______________
Elizabeth Padillo Olesen (in Cebuano language) 

March 20,2017

Ihatag ang Kalinaw sa Aleppo! 

Ang kasingkasing sa matag tawo

nga nagtan-aw sa kahimtang

sa katawhan sa Aleppo

gipikas sa hilabihang kasakit, 

dangoyngoy nga madungog 

gikan sa mga anak nga nawagtangan

ug ginikanan, mga ginikanan 

nga nawagtangan sa ilang mga anak.

Ang tiyabaw sa hilabihang kaguol 

og kasakit gibubo gawas sa galamhan, 

ingon nga wala nay tingog nga nahibilin

alang sa pagpabati sa maong gilapdon 

og gilabmon sa maong kasakit. 

Hain na man ang konsyensya sa

tawo sa pagila sa matuod og bakak,

konsenysa sa pag-ila sa gugma og 

kasilag diin ang nagpatigbabaw na lamang

mao ang kabangis sa hunahuna og kamot

sa tawo nga migamit ug bomber 

alang sa tinguha sa pagdaug. 

Hatagi ug kalinaw ang Aleppo

niining mabugnaw nga mangitngit

nga mga adlaw diin sa matag minuto

ang kinabuhi sa tawo giwagtang og 

gipatay sa mga bangis nga masigkatawo.

Ihunong ang kabangis og ibalik ang tawhanong

kasingkasing sa matag tawo nga karon

nagadula sa kalayo sa Aleppo! 

_______________

December 18, 2016 

On the terrible situation in Aleppo and a plea for mercy and true humanity. 

Kasingkasing Giliminan

Ang kasingkasing giliminan
sa hilabihang kabalaka, kahasol
og kaguol; ang katawhan
nagminatay sa tumang kalisdanan
Tan-awa ang nahitabo sa Syria
og ubang kanasuran diin ang kamatay
maoy kanunay nga giatubang.
Ginoo, hatagi og kalinaw ang yuta
gikan sa tumang kabangis, kasilag
og tinguha sa pagguba lamang
sa imong katawhan og kabutan.
Ginoo, ipakita ang imong nawong
sa yuta nga puno sa gugma og kalooy
og unta ang imong gugma pinaagi
ni Jesus mopuli sa kasingkasing
sa katawhan kinsa giliminan
sa kasilag, kabangis og tinguha
sa pagdaot sa imong tibook kabuhatan. 

November 23, 2016

A poem in Cebuano expressing the deep sorrow over when hearts are choked with hate, vengeance  and able to carry out plans to destroy and kill God's people and the whole of creation. It is asking God to bring back to the hearts of people the innate love and compassion which Jesus brings to all. Elizabeth Padillo Olesen